Echedoù e Brezhoneg - Lichess, Youtube, Facebook

Diverradenn

Ar braz diouzhomp ‘neus bet c’hoariet echedoù dija. Pa vefe pa oemp bugel pe krennard gant unan eus ar gerent, pe en un oaled bennak er skolaj pe el lise... Darn an dud a anavez ar reolennoù hag a oar e c’hello an eskob mont a-veskell pe e fiñvo ar marc’heg e stumm un L ha gant ar pal, evel-just, reiñ lamm d’ar roue.

Met kalz, kalz kompliketoc’h eo ar c’hoari avat ! Ret eo jediñ fiñvadennoù da zont an enebour hag anavezout an taktekoù evit gellout bezañ an hini finañ hag efedusañ.

A-drugarez d’ar chadenn Youtube Echedoù e brezhoneg kaset da benn gant Brendan Budok Durand-Le Ludec, unan eus an 10 c'hoarier barrekañ e Breizh, e vo moaien deoc’h da zeskiñ ar peadra evit gounit ar partiadennoù a zeu a-enep ho mignoned.

Kavet e vo ganeoc’h amañ dindan (pe war YouTube) un atersadenn gant Brendan-Budok Durand-Le Ludec. Lakaet e vez ar gaoz war bed an echedoù dre-vras, met ivez e darempred gant ar c’hoari, koulz ha war e chadenn Youtube: "Echedoù e brezhoneg"

Kinnig a ra ar chadenn Youtube-mañ videoioù evit an deraouidi, koulz hag evit ar re varrekañ.

Kavet e vo war ar chadenn videoioù a zispleg talvoudegezh ar pezhioù, pe ar mod m'eo ret kregiñ ur bartienn gant ar pezhioù du pe gwenn. M’ho peus c’hoant fougeal gant ho parregezhioù nevez e c’helloc’h mont da sellet ouzh ar video a zisplego deoc’h penaos gounit ur bartienn e div pe deir zao.

Evit ar re varrekañ e kaver videoioù ‘lec’h ma tispleg ha ma tielfenn Brendan Budok taolioù bravañ mistri ar bed war an echedoù…

Ha ma n’eus ket birvilh a-walc’h evidoc’h gant an echedoù e c’helloc’h mont da welet ur bartienn chess boxing, ur c’hrogad e-lec’h ma vez c’hoariet echedoù ha boks war un dro !